Gibela are bihurtuta

Britainia Handiko ikertzaile batzuek zapaburuen gibel-zelulak are-zelula bihurtzea lortu dute, eta gauza bera egin dute, laborategian, giza zelulekin. Hori lortzeko, gibel-zeluletan arerantz bideratzen dituen gene bat sartu dute: Pdx1 genea. Izan ere, enbrioiaren garapenean, gibel- eta are-zelulak antzeko ehunetik hazten dira, eta gene hori ezinbestekoa da are-zelulak garatzeko.

Dirudienez, ikerketa horiek diabetea sendatzeko bide berri bat ireki dute: agian, diabetikoen gibelaren zati bat intsulina ekoizteko gai den are osasuntsu bihurtzea lortu ahal izango da.

Hala ere, oraindik bide luzea dute aurretik: ikertzaileek berek onartu dutenez, lortu dituzten are-zelulak funtzionalak direla ikusi behar dute lehenik. Ondoren, teknika horren bidez diabetea duten saguak sendatzeko gai direla frogatu, eta, azkenik, gizakietan probatu behar da.