Finlandiako zaborrak

Finlandian 180.000 laku eta 338.000 km² baso daudela kalkulatzen da, baina zaborrak erretzerik inon ez dute nahi. Etxeetako zaborrak erre ordez (garestiegia dela diote), nahiago dute osagaiak bereizita biltzea. Beirazko eta metalezko enbalajeen % 90 edukiontzi berezietara bota eta hilean behin jasotzen dute. Zabor organikoak, berriz, bi hilean behin bildu eta ongarriak egiteko plantara eramaten dituzte.

Corenso etxeak fruta-zukuen eta esnearen kartoizko ontzien % 10 jasotzen ditu paper zuntzarekin kartoizko arrabolak egiteko. 1995. urteko azken hiruhilekoaren ondoren 20.000 tona tetrabrik birziklatu dira. Gainera Finlandian erabilitako paperaren % 60 birziklatua da, eta harrigarria dirudi Europako lehen fabrikatzailea izanik maila hori izatea.