FANTOM, zelulen garapenaren zelataria

Zelula heldugabea heldu bihurtzeko bidea gidatzen duten geneen eta proteinen analisi zehatza eta zabala argitaratu du FANTOM nazioarteko ikerketa-partzuergoak. Hain zuzen, zelulen garapenean parte hartzen duten RNA-molekulak sekuentziatu dituzte, eta hortik ondorioztatu dute zer proteinak aktibatzen edo desaktibatzen dituzten geneak zelula garatzeko bidean. Datu-multzo hori oso baliagarria izango da zelularen garapena aztertzen duten ereduak osatzeko, eta aplikazio garrantzitsua izan dezake, adibidez, zelula ametan oinarritutako terapietan.