Erretiroa hartzeko garaia iritsi zaio Alvin itsaspekoari
2004/10/01 Elhuyar Zientzia Iturria: Elhuyar aldizkaria
40 urte itsasoaren sekretuak agerrarazten eman eta gero, Alvin ordezkatzeko garaia da. Haren ondorengoa 2008rako izango da prest, eta 6.500 metroko sakonerara jaisteko gai izango da. Alvin , berriz, ez zen 4.500 metrotik behera jaisteko gai, baina, hala ere, 1.800 ikerketa egin ahal izan dira Alvin -ek bildutako datuei esker.
![](images/A202012.jpg)
Orain, ondorengoa bukatu eta lanean hasi zain daude ikertzaileak. Izan ere, Atlantikoko Kaiman mendikatea aztertzeko irrikatan daude. Mendikate hori 5.000 metroko sakoneran dago, eta ustez komunitate bentonikoak daude han.
Gainera, Alvin -ek ez bezala, itsas hondorako bidean, edozein sakoneratan egin ahal izango du lan; beraz, tarteko urak ere aztertzeko aukera emango du. Informazioa bidaltzeko sistema ere askoz hobea izango du.
Nolanahi ere, denak ez daude Alvin -en ondorengoaren alde. Izan ere, batzuen ustez gizakiak daramatzaten itsaspekoak ez dira beharrezkoak, datuak biltzeko robotak ere oso baliagarriak baitira. Gainera, robotak itsaspekoak baino merkeagoak dira.
![](https://elia.eus/static/elhuyar/img/elia_RGB.png)
Gai honi buruzko eduki gehiago
Elhuyarrek garatutako teknologia