Emakumezko zein gizonezkoentzat balioko duen antisorgailua
2001/10/11 Agirre Ruiz de Arkaute, Aitziber - Elhuyar Zientzia
Ohiko antisorgailuak deserosoak izaten dira edo osasun-arazoak eragin ditzakete. Horrela, emakumezko asko poztuko litzateke hormonen erabileran oinarritzen ez den pilula sortuko balute. Garatzen ari diren metodo berriak, hartara, hormonak ez hartzea ahalbidetuko du, eta, gainera, emakumezkoek zein gizonezkoek hartu ahal izango dute.
Saguekin egindako saioetan espermatozoideen mugikortasuna kaltzioaren mendekoa dela ikusi dute. Espermatozoidearen isatsean kaltzioa sartzeak isatseko mugimendua eragiten du. Gauza jakina da azkar mugitzeko ahalmenik gabe espermatozoideak ezingo lukeela obuluraino iritsi eta ernaldu.
Berez, espermatozoideek ez dute beti izaten horren azkar mugitzeko ahalmenik; emakumezkoaren ugaltze-organoetan sartzean eskuratzen dute. Badirudi emakumezkoaren seinale kimiko bati erantzunez eskuratzen dutela hipermugikortasuna, espermatozoidean kaltzioaren sarrera eragiten duenean.
Kaltzioa zelulak horretarako sortzen dituen kanaletatik sartzen da. Adituen esanean, gizonezkoen kasuan, ohiko antisorgailuen ordez, kanal horiek blokeatzen dituzten konposatuak erabiltzea bideragarria izan daiteke. Hala ere, emakumezkoek ere hartu ahal izango dituzte kaltzio-kanalen blokeatzaileak, beren ugaltze-aparatuan sartzen diren espermatozoideengan izango bailukete eragina.
Oraingoz zailtasuna kanal-mota hori soilik blokeatzen duen konposatua aurkitzea da, bestelako arazorik sor ez dezan. Antisorgailu berriok garatzeak hainbat urteko lana eska dezakeen arren, adituak baikor azaldu dira, eta emakumezkoek pilula hartzean pairatzen dituzten osasun-arazoak saihestu ahal izango direla aipatu dute.
Gai honi buruzko eduki gehiago
Elhuyarrek garatutako teknologia
