Eguzkiarena baino 320 aldiz masa handiagoa duen izarra

Europako astronomo-talde batek orain arte ezagutzen ziren izarrik masiboenak hauteman berri ditu. Horietako batek jaiotzetik Eguzkiarena baino 320 aldiz masa handiagoa duela jakinarazi du. Eta, alde horretatik, aurkikuntzak marka oro hautsi ditu, orain arte aurkitutako izarrik astunenek Eguzkiak baino 150 bider masa handiagoa baitzuten. Handiena ez ezik, distiratsuena ere bada izar hori; Eguzkia baino hamar milioi aldiz distiratsuagoa. Ezaugarri horiek dituztenei izar supererraldoi urdinak deritze.

Aurkikuntza ESOren Very Large Telescope-ari (VLT) esker egin dute, eta NASAren Hubble teleskopioaren artxiboko informazioa ere baliatu dute eginkizun horretan. Astronomoek azaldu dute NGC 3603 eta RMC 136a izeneko izar-multzoak gertutik behatzeko aukera izan dutela horrela.

Bada, hautemandako izarrik handiena (R136a1 du izena) R136 izar-multzoan aurkitu dute. Izar bero, gazte eta masiboen multzo bat da hura. Tarantularen Nebulosaren barruan kokatuta dago, Esne Bidetik gertu dagoen galaxia batean, Magallanesen Hodei Handian, alegia (165.000 argi-urtera).

Astronomoetako batek azaldu duenez, “gizakiok ez bezala, izar masiboak oso pisutsu jaiotzen dira, eta urtetan aurrera egin ahala pisua galduz joaten dira. Milioi bat urte baino pixka bat gehiago izanda, R136a1 adin ertainekoa da gaur egun; dagoeneko pisu handia galdu du. Hasieran zuen masaren bostena —edo 50 eguzki-masa baino gehiago— galdu duela esan genezake. Dena den, Eguzkiarena baino 265 bider masa handiagoa izaten jarraitzen du uneotan ere”.

Irudia: ESO/P. Crowther/C.J. Evans.