Botulismoaren eragilea deszifratuta

Clostridium botulinum bakterioak botulismoa, oso gaitz larri eta hilgarria, eragiten du. Gaitza gaizki esterilizatutako kontserbak jateagatik agertu ohi da; bakterioaren eraginez gorputzak, arnas aparatuak barne, paralisia sufritzen du eta gaixoa itota hiltzen da. Estatu Batuetan botulismoaren aurkako aurerrapausoa eman dute, bakterioaren egitura deszifratzea lortu baitute. Toxina nerbio-zelulei nola lotzen zaien eta neurotransmisoreak nola blokeatzen dituen ikertu dute, eta nahiz eta bakterioak mintz zelularra nola zeharkatzen duen oraindik argitu ez duten, botulismoaren kontrako txertoa bidean egon daiteke. Aldi berean, bakterioari funtzio terapeutikoak aurkitu dizkiote, hala nola muskuluen nahi gabeko uzkurdurak tratatzeko.