Arrantzak txikiagotu ditu bakailao-aleak

Itsasoetako bakailaoa gero eta urriagoa eta txikiagoa da. Ale helduen tamaina % 20 txikitu da 1960ko hamarkadaz geroztik. Horren eragile nagusia gehiegizko arrantza dela ondorioztatu dute Saint Lawrence Golkoan, Kanadan, egin duten azterketa batean. Azaldu dutenez, bakailaoak harrapatzeko erabiltzen dituzten sareetan ale handienak hartzen dituzte, eta itsasoan bakailao txikiak gelditzen dira. Txiki horien artean mantso hazten direnek aukera gehiago dute sexu-heldutasuna lortu eta ugaltzeko, arrantzaleek harrapatu aurretik. Denboraren poderioz, txiki horien ondorengoak nagusitu dira populazioan.