Uretara iristen diren antibiotikoak bertako ekosistemarentzat kaltegarriak izateko mailetan daude. Hala ondorioztatu du Madrilgo Unibertsitate Autonomoko eta Alcala de Henaresko Unibertsitateko ikertzaile-talde batek Water Research aldizkarian argitaratu duen artikulu batean. Hain zuzen, bost antibiotikok ur-inguruneko bi bizidun adierazgarritan, Anabaena zianobakterioan eta Pseudokirchneriella subcapitata alga berdean, duten eragina aztertu dute ikertzaileok.
Bost antibiotiko hauek aztertu dituzte: amoxizilina, eritromizina, tetraziklina, norfloxazinoa eta lebofloxazinoa. Egindako esperimentuetan ikusi dute antibiotikoek, bakarka, kaltetu egiten dituztela organismoak. Oro har, gainera, zianobakterioetan eragin handiagoa dute. Ez da harritzekoa, antibiotikoak, hain zuzen, bakterioei eragiteko diseinatuta baitaude. Hala, eritromizina oso toxikoa da bi bizidunentzat; tetraziklinak eragin handiagoa du alga berdean, eta, lebofloxazinoak eta norfloxazinoak, berriz, zianobakterioan. Amoxizilina, azkenik, toxikoa da zianobakterioentzat, baina ez alga berdearentzat.
Bakarkako eragin horrez gain, ordea, elkarrekin konbinatuta, eragin are kaltegarria dutela ondorioztatu dute. Izan ere, sinergiak dituzte elkarrekin konposatuek, eta efektu toxikoak bakarka eragiteko beharrezkoa den kontzentrazioa baino txikiagoan egonda ere agertzen direla. Ingurune naturaletan, ohikoa da antibiotiko-mota asko nahasita agertzea uretan.
Lakar Iraizoz, Oihane
Elhuyar Zientzia Elhuyar Fundazioko Zientziaren Komunikazioa sailean ari da lanean 2006ko urriaz geroztik. Elhuyar Zientzia eta Teknologia aldizkarian ia hilabetero artikuluak argitaratzen ditu, eta Basque Research webguneko arduraduna eta erredaktorea ere bada. Euskal Herrian egiten den ikerketaren berri ematen du Basque Researchek. Biologian lizentziatua da, Leioako EHUn egin zituen ikasketak, eta, Elhuyar Fundazioan baino lehen, Bertiz Jaurerria Parke Naturalean aritu zen lanean, bisitariei harrera egiten eta ingurunea zaintzen.
