Aluminioa supernoba-kopurua zenbatesteko
2006/05/01 Elhuyar Zientzia Iturria: Elhuyar aldizkaria
![](images/H220-003-01.jpg)
Esne-bideko supernoba-kopurua zenbatetsi dute aluminioaren isotopo erradiaktibo bati esker. Ikerketa Max Planck Institutuan egin dute, Garching-en (Alemania).
Ikertzaileek aurkitu dutenez, supernobetan aluminio-26 atomoak sortzen dira, baina, isotopo ezegonkorrak direnez, berehala desegiten dira, eta prozesuan gamma izpiak askatzen dituzte. Gainera, ikusi dute gamma izpi horiek galaxiaren barnealdetik datozela. Izan ere, Esne-bidearen barnealdean espiralaren abiadura handiagoa da, eta, ondorioz, gamma izpien argi-espektroa modu jakin batean lerraturik iristen zaigu.
Horrela ondorioztatu dute aluminio-26 isotopoa uste zen baino oparoagoa dela gure galaxian, nahiz eta ohiko aluminio-27 isotopo egonkorraren aldean hutsaren hurrengo izan. Gero, informazio horrekin, gure galaxiako supernoba-kopurua zenbatetsi dute. Emaitza koherentea denez aurreko beste ikerketa batzuetan modu ez-zuzenean ateratako ondorioekin, ontzat eman dute.
![](https://elia.eus/static/elhuyar/img/elia_RGB.png)