Odol-biotxipa

Horren adibide da BloodChip edo odol-txipa, Bizkaiko Parke Teknologikoan dagoen Progenika enpresak garatu duen produktua. Ikerketa bioteknologikoaren eremuan lan eginez eta DNA-txipen teknologia aurreratua erabiliz, enpresa honek diagnostiko genetikorako produktuak ekoitzi eta merkaturatzen ditu.

Ikuspegi genetiko batetik abiatuta, odol-emaile baten eta hartzaile baten arteko bateragarritasuna ezagutzeko aukera ematen du BloodChip-ak, transfusioetan kontrako erreakziorik ager ez dadin.

Odol-transfusioetan gaur egun egiten diren bateragarritasun-analisiak metodo segurua dira, baina, hala ere, kontrako erreakzioak eta alergiak ageri ohi dira transfusioen % 3an. Txip berri honekin, transfusioen segurtasuna % 99,8raino igotzen da; horixe da ekarpen nagusia.

Munduko talde etnikoen aldaerarik esanguratsuenak biltzen dituzte BloodChip-aren informazioa osatzen duten hamar odol-taldeek.

Hauts-partikulen aurka babesturiko gela zuri baten barneko makinetan ekoizten da txipa. Hementxe sartzen da, fisikoki, hamar odol-taldeen informazioa txiparen barnera.

BloodChip-aren bidez odol-lagin baten informazioa lortzeko, hainbat pauso dituen prozesua egin behar da. Odola ateratzeko bankuetatik jasotzen dira odol-laginak, saio-hodietan. Odol-lagin horietatik abiatuta, odolaren DNA lortzen da, alegia, emailearen informazio genetikoaren kodea.

Kode genetikoa ezagututa, lortutako DNA-lagina anplifikatu egiten da, hainbat analisi egin ahal izateko eta bermatzeko prozesu analitikoan zehar ez dela informaziorik galtzen ez kalterik gertatzen.

Odol-laginaren bateragarritasun genetikoa ezagutzeko, DNAa osatzen duen helize bikoitza bi DNA-katetan banatu behar da ondoren.

Jarraian, txipa hibridatzeko makinan sartzen da. Makina horretan, odol-laginetik datorren DNA-katea BloodChip-ean sartzen da, bertan dauden kateekin nahasteko. Hala, zein DNA-sekuentziarekin elkartzen den jakinda DNA-helize bikoitza zein katerekin osatzen duen ikusita, alegia, jakin daiteke zein den laginaren odol-taldea.

Hibridatzeko makinako prozesua amaitzen denean, txipa prest dago eskanerrean egiten den datuen analisirako. Hibridazioa BloodChip-aren zein DNA-sekuentziatan gertatu den bereizten du eskanerrak. Sekuentzia horiek seinale-puntu bidez erakusten ditu softwareak. Modu horretan, pazienteak dituen DNA-sekuentzien arabera, zer odol-talde duen zehazki ezagutuko da; modu horretan, ziurtatu egiten da odol-transfusioetan ez dela inolako kontrako erreakziorik gertatuko.

Progenikaren BloodChip-a odol-transfusioen zentro handietan erabiltzen da gaur egun, Galdakaoko osasun-zentroan adibidez, baita Madril eta Bartzelonako beste hainbat zentrotan ere. Eta, etorkizunean, txiparen erabilera beste lurraldeetara ere etengabe hedatuz joango dela aurreikusten da.