Emakume zientzialarien argitan

Elisa Sainz de Murieta Zugadi (Bilbo, 1977) BC3ko eta EHUko ikertzailea da, eta, bereziki, klima-aldaketaren eraginak eta egokitzeko neurriak ikuspegi sozioekonomikotik aztertzeaz arduratzen da. Solasaldian, berotze globalari eta klima-larraildiari lotutako gaur egungo kezkei erantzunak eman eta irtenbideak proposatu ditu. Politika publiko ausart eta eraginkorren alde agertu da.

"Emakume zientzialarien argitan" zikloaren barruan egin da solasaldia, Ana Galarraga Aiestaranen eskutik. Zikloa Elhuyar eta Donostia Kulturaren arteko elkarlanaren emaitza da.

Mirene Begiristain Zubillaga (Andoain, 1972) ekonomian doktorea da, eta irakaslea eta ikertzailea EHUren Ekonomia eta Enpresa Fakultatean. Bereziki, nekazaritza eta elikagaia-sistemak ikertzen ditu, agroekologiaren eta feminismoaren ikuspegietatik. Euskal Herriko hainbat esperientzia eta prozesu kolektibotan parte hartzen du, elikadura-burujabetza helburu.

"Emakume zientzialarien argitan" zikloaren barruan egin da solasaldia, Ana Galarraga Aiestaranen eskutik. Zikloa Elhuyar eta Donostia Kulturaren arteko elkarlanaren emaitza da.

Olatz Ortega Vidales Bilbon jaioa da, 1997an. Zientzia demokratikoagoa eta inklusiboa izateko lanean ari da. EHUn Biologia ikasi ostean, Suediara joan zen LGTBIQ+ pertsonen eta desgaitasun intelektuala duten pertsonen ahalduntzearen inguruan lan egitera. Gerora, EHUko Ekotoxikologiako Erasmus Mundus masterra ikasi zuen. Egun, zientzia gizartean zabaltzeko lanean ari da; besteak beste, Plentziako itsas Estazioko "Kontuz! Ez nazazu zapaldu!" herritarren zientziako proiektu inklusiboaren ikertzaile-taldearen parte da. 

Ana Galarraga Aiestaranek gidatu du solasaldia, "Emakume zientzialarien argitan" zikloaren barruan, eta, Ortegak, bere ibilbidea azaltzeaz gain, zientzian era guztietako pertsonek parte hartzearen garrantzia nabarmendu du, eta helburu hori duten proiektuak aurkeztu ditu.

Zikloa Elhuyar eta Donostia Kulturaren arteko elkarlanaren emaitza da.

Laida Arbizu Agirre filosofoa jarrera negazionistak aztertzen ari da bere doktoretzan. Bizi ditugun garai hauetan, negazionismoak zer forma hartzen dituen, nola zabaltzen den, eta nola egin aurre azaldu du, Ana Galarraga Aiestaran Elhuyarreko zientzia-komunikatzailearekin izandako solasaldian. 

Solasaldia "Emakume zientzialarien argitan" zikloaren barruan izan da, Elhuyarren eta Donostia Kulturaren arteko lankidetzari esker.

Aitziber Sarobe Egigurenen eta Ana Galarraga Aiestaranen arteko solasaldia, biodibertsitatearen galera eta haiei aurre egiteko politikei buruz. Solasaldia Emakume zientzialarien argitan solasaldi-zikloaren barruan kokatzen da, emakume zientzialari euskaldunak ezagutzera ematea duena helburu.

Sarobe biologian doktore da eta ekologian espezializatuta dago. Irakaslea da HUHEZIn, eta, militantzian, Arkamurka Zarauzko natura-taldeko kidea, baita Naturkon Gipuzkoako talde ekologistarena ere. Urteak daramatza naturaren kontserbazioaren alde lanean, eta ikuspegi horretatik eta ebidentzia zientifikoetan oinarrituta, kritikagarriak iruditzen zaizkio lurraldearen gainean hartu diren eta hartzen ari diren hainbat erabaki.

Emakume zientzialarien argitan solasaldi-zikloa Donostia Kulturaren eta Elhuyarren arteko elkarlanaren emaitza da.