Minbiziaren kontrako sistema berritzaile bat garatu dute Gaiker-IK4 buru izan duen proiektu batean. Tresna gisa nanopartikulak erabilita, tumoreen kokalekua zehaztea eta haiek hiltzea zuen helburu proiektuak.
Lau urtez aritu dira lanean helburu bikoitz hori lortzeko Europako hogei erakunde, eta, lortutako emaitzetako bat izan da tumoreei antzemateko sistema garatzea. “Helburua zen gaur egungo sistemak (biopsia) bezain inbaditzaileak ez izatea. Bada, nanopartikulen ezaugarri jakin batzuei esker, eta sortutako software bat baliatuz, tumorearen eskualdeko irudiak lortzen dira, eta zehaztasun handiz ikus daiteke zer dimentsio duen tumoreak”, azaldu du Pedro Heredia Gaiker-IK4ko ikertzaile eta proiektu-buruak. Eta nanopartikuletan gordetako farmakoak askatuz, tumore-zelulak hiltzea ere lortu dute ikertzaileek, in vitro egindako esperimentuetan.
Hala ere, “proiektu guztietan gertatzen den bezala, emaitza gazi-gozoa izan da, gauza oso garrantzitsuak lortu ditugulako, batetik, baina ez ditugulako genituen helburu guztiak bete”, dio Herediak. Arazoak in vivo esperimentuak egitean agertu zaizkie: “Emaitzak ez dira hain onak izan, ez baitugu lortu aurretik egiten zen tratamendua baino eraginkorragoa izatea. Izan ere, animalia-sistemak askoz konplexuagoak dira, eta laborategian hazitako zeluletan agertzen ez diren prozesuak dituzte, hala nola immunitate-sistema”.
Aurretik bide luzea dagoela aurreikusten du ikertzaileak, “in vivo egindako entseguak oso mugatuak izan direlako. Besteak beste, nanopartikulak berak hobetu egin behar dira, esperimentuetan ikusi baitugu nanopartikulen sorta batetik bestera asko aldatzen zela lortutako emaitza. Hau da, sorta guztietan emaitzak errepikatzea lortu beharko genuke”.Lakar Iraizoz, Oihane
Elhuyar Zientzia Elhuyar Fundazioko Zientziaren Komunikazioa sailean ari da lanean 2006ko urriaz geroztik. Elhuyar Zientzia eta Teknologia aldizkarian ia hilabetero artikuluak argitaratzen ditu, eta Basque Research webguneko arduraduna eta erredaktorea ere bada. Euskal Herrian egiten den ikerketaren berri ematen du Basque Researchek. Biologian lizentziatua da, Leioako EHUn egin zituen ikasketak, eta, Elhuyar Fundazioan baino lehen, Bertiz Jaurerria Parke Naturalean aritu zen lanean, bisitariei harrera egiten eta ingurunea zaintzen.
