Nepalgo Royal Chitwan parke nazionalean lortu dute tigreak ugaritzea. 1996an animaliok babesteko martxan jarritako programa baten emaitza izan da. Tigreak ugaritzearekin batera, ordea, gora egin dute tigreek gizakiei egindako erasoak; programa martxan jarri aurretik gertatzen ziren erasoak halako sei gertatzen dira orain.
Gizakiei egindako erasoek belztu egin dute beste ikuspuntu batetik oso ona den berria. Ordura arte bizi ziren basoen inguruko lursailak tigreen bizilekuaren eta biztanleen arteko trantsiziogune bihurtu zituztenean ugaritu ziren tigreak. Bi urtean hasi ziren tigreak inguru haietaz baliatzen. Inguruko biztanleek, ordea, ustiatu egiten zituzten lur haiek hein batean, eta orduan gertatu ziren erasoak.
Kudeatzaileak arazo hori konpontzeko bideak bilatzen ari dira, bertakoak hasi baitira animaliok ehizatzen eta pozoitzen. Uste dute bi ildotatik landu behar dutela arazoa. Batetik, biztanleei jakinarazi nahi diete zein den tigreen portaera eta zer arrisku ekar diezaiekeen tigreak bizi diren basoetara baliabide bila joateak. Bestetik, tigreei irrati-uhinak igortzen dituzten lepokoak jartzea pentsatu dute, biztanleek une oro jakin dezaten non dauden, eta haien bidetik urrun ibiltzeko.
Irudia: Meg and Rahul
Lakar Iraizoz, Oihane
Elhuyar Zientzia Elhuyar Fundazioko Zientziaren Komunikazioa sailean ari da lanean 2006ko urriaz geroztik. Elhuyar Zientzia eta Teknologia aldizkarian ia hilabetero artikuluak argitaratzen ditu, eta Basque Research webguneko arduraduna eta erredaktorea ere bada. Euskal Herrian egiten den ikerketaren berri ematen du Basque Researchek. Biologian lizentziatua da, Leioako EHUn egin zituen ikasketak, eta, Elhuyar Fundazioan baino lehen, Bertiz Jaurerria Parke Naturalean aritu zen lanean, bisitariei harrera egiten eta ingurunea zaintzen.
