Nolakoa da sugarra grabitaterik gabe? Sugarra oso ezberdina da espazioan eta Lurrean. Sandra Olson, NASAko Gleen ikerketa-zentroko ingeniari aeroespazialak iruditan egiaztatu du hori.
Mikrograbitate-egoeran dagoen sugar baten hiru irudi gainezarriz lortu du goiko irudi eder hori. Irudi bakoitzak erakusten du sugarra nola hedatzen den zelulosazko paper batean mikrograbitate-egoeran. Kolore ezberdinek sugarrean gertatzen diren erreakzio kimikoak irudikatzen dituzte. Gune urdinak kimioluminiszentziak eragindakoak dira (erreakzio kimiko batek sortutako argia); kolore zuria, horia eta laranja duten guneak, berriz, sugarraren kedar distiratsuaren ondorio dira.
Irudi honek 2011ko Combustion Art Competition lehiaketa irabazi du.
Irudia: NASA
Kortabitarte Egiguren, Irati
Elhuyar Zientzia
