Polimerozko OptoTxip-ak, komunikabideetako beste iraultza bat?

OptoTxip-ak, edo moduladore elektro-optikoak, seinale elektrikoak seinale optiko bihurtzen dituzten elementu mikroskopikoak dira. Hauen bidez komunikabideetarako hain beharrezkoa den informazio-garraioa erabat azkartzen da, eta zuntz optiko edo satelite bidezko komunikabideetan garrantzi handia dute.

Gaur egun telekomunikabideetan hain beharrezkoa den informazio-jarioa azkartzeko aukera aproposa eskaintzen dute, azalera oso txikian zehar informazio-mordoa transmititzeko gai baitira.

Washington eta Kalifornia Hegoaldeko Unibertsitateetan garatutako zenbait polimerok ezaugarri ezin hobeak dituzte telekomunikabideetan beste iraultza bat eragin dezaketen OptoTxip-ak eraikitzeko. Polimerozko OptoTxip-ak segundoko 1.000 Gigabit garraiatzeko gai dira, eta horretarako kristal arruntek baino sei aldiz energia gutxiago behar dute. Hau dela eta, alor honetan aurrerakuntzak izatea espero da, OptoTxip-ak erabiltzea askoz merkeagoa eta eraginkorragoa izango baita hemendik aurrera. Larry Dalton ikertzailearen arabera, moduladore elektro-optikoek denbora errealeko komunikazioa egiteko aukera emango dute oso epe laburrean. Informazioa garraiatzeko ahalmen handiagoari esker, Informazioaren Gizartean benetako iraultza gertatuko dela uste dute zientzialariek.