Oroimen-kontuak. Ondo pentsatu zer gorde nahi duzun buruan

Pragara egin zenuen bidaia hura ahaztu ezinik zabiltza.

Begiratu ezazu zer ordu den; agian berandu zabiltza maitaleari bisita egiteko, eta horrelako aukerak ez dira galdu behar. Zenbat denboraz gogoratuko duzu zer ordu den orain? Bueno. Hori ez da hain garrantzitsua. Askoz garrantzitsuagoa da gogoratzea noiz espero duen zure bikoteak etxera itzultzea. Betiko bikoteak, esan nahi dut. Jakina, horren araberakoa izango da bisita klandestinoaren iraupena, ezta?

Hori bai, gogoan hartu beharko duzu zein topatu duzun bidean eta non. Zure koartada datu horien mende dago. Ezin da bi lekutan batera egon, ezta bata bestetik urruti daudenetatik denbora gutxian pasatu ere. Horregatik egon behar duzu adi, eta daturen bat edo beste baiezta lezaketen pertsonen berri izan behar duzu. Informazio hori ezinbestekoa izango da iruzurra ondo babesteko. Zure bikotea ez da artaburua, betiko bikotea, esan nahi dut, eta, gauzak ez badira koherenteak, konturatu egingo da.

Garunak gorde egin beharko du okina eta harekin zegoen kuxkuxero hori topatu dituzula, baina, oroitzapenak egun batzuk baino ez du iraungo. Hurrengo astean, ez dizu axolako gaur okina eta kuxkuxeroa zeuden ala ez, nahikoa lan izango duzulako hurrengo zurigarria antolatzen. Beraz, zure burmuinak baztertu egingo ditu aste honetako xehetasunak, nolabait, datorren astekoei tokia egiteko.

Maitalearen etxera iritsi zara, eta esan diozu ez duzula denbora asko . Noski, arrazoi osoz, kexatu egin zaizu. " Horrela ibili beharko dugu beti ?" galdetu dizu. Horrek gogora ekarri dizkizu aspalditik ezabatu nahi izan dituzun errieten oroitzapenak, baina, zoritxarrez, horiek ere ederki gorde ditu zure garunak. Gorde, eta unerik okerrenetan azaleratu egin dizkizu. Oroimena izatearen desabantailak dira horiek; baina, tira, zuk sinetsi ala ez, gogoratzearen abantailak arazoak baino handiagoak dira. Ez dago zalantzarik.

Laborategiko euliak, esperimentuen biktima egokiak.

Garuna makina miresgarria da; gauza bakoitza behar den denboran gordetzen du. Eztabaidaz gain, zure maitalearekin pasa zenuen gau bakar eta liluragarri hura grabatuta dago buru barruan; baita bikotearekin egin zenuen Pragarako bidaia hura ere, betiko bikotearekin egindakoa, esan nahi dut.

Baina kontzentra gaitezen. Maitaleak eta zuk gozatzeari ekin diozue. Eta dena ondo joan da; bueno, ia dena. Une batez, ongia eta gaizkia zer diren gogoratu duzu. Txikitatik ederki 'zizelkatuta utzi zizuten sentimendu hori buruan '. Beste gauza gehienak baino sakonago duzu hori garunean sartuta.

Eta oso gauza bitxia da: neurologo batzuen ustez askoz interesgarriagoa da nola gordetzen dituzun oroitzapen horiek guztiak zure maitalearekin duzun harreman morbosoa baino. Zer ikusten dute bata zuridun horiek zure garunean?

Lasai egon; ikusi, ez dute ezer asko ikusten. Badakite gauza asko daudela, baina ez dituzte ikusten. Ezin dute. Hobe zuretzat, ezta?

Euliaren garuna.

Neurologo batzuek euliak ikertzen dituzte; ez zu bezalako pertsona interesgarriak. Euliak? Bai, euliak. Eta badago arrazoi sendo bat hori egiteko: euliaren garuna zurea baino askoz sinpleagoa da, zurea, zakur batena, sagu batena eta arrain batena baino sinpleagoa, hain zuzen ere.

Hala ere, oso garun konplexua dute euliek; izan ere, edozein garun da konplexua. Besteak beste, mugitzeko, arnasa hartzeko eta oinarrizko mila gauza egiteko behar den guztia du gordeta. Neurologoentzat misterio handia da nola egiten duen hori; hori bakarrik ulertuko balute ere …

Dena dela, euliak askoz gauza gehiago egiten ditu garunarekin; gauzak ikasteko gaitasuna du. Zer ikas dezake euli batek? Ez da txantxetakoa: esate baterako, usainak ezberdintzen ikasten du. Eta hori erabiltzen dute neurologo askok euliaren garunaren funtzionamendua ikertzeko.

Egiten dituzten esperimentuak krudelak dira, egia da. Horietako bat hau da: euliari usain jakin bat eskaintzen diotenean, deskarga elektriko txiki bat ematen diote. Behin eta berriz. Horrela, Pavloven zakurrekin bezala, euliak erlazionatu egiten ditu usain hori eta deskarga. Ikasi egiten du.

Ondo gordeta duzu buruan maitalearen koloniaren usaina, ezta?

Duela gutxi, neurologoek aurrerapauso handia egitea lortu dute esperimentu horren bitartez. Sistema bat garatu dute neuronen arteko konexioak behatzeko, eta esperimentua egin aurretik eta ondoren behatu dute euliaren garunaren egitura. Usainaren kontua ikastearen ondorioz, aldatu egiten da euliaren garuna; ikusi egin dituzte neuronen arteko konexioetan aldaketak. Lehen aldiz, gainera. Oroitzapen baten arrastoa lehen aldiz detektatu dute; ez dago gaizki.

Eskerrak eulia zela, eta ez zu bezalako bat, ezta?

Horrek agian ez du justifikatzen euliei eragiten zaien kaltea esperimentuan. Agian bai. Agian nahikoa zen zu eta maitalea ikertzea, haren usaina auskalo zein gozamenekin erlazionatzen baituzu. Eta, agian, esperimentu hori eginda jabetuko zara bikoteak ere sekulako gozamenak eragiten dizkizula bere usaina barneratzen duzun bakoitzean. Betiko bikoteak, esan nahi dut.

Neurologoak, euliak, maitalea…; hobe duzu lehenbailehen etxera itzultzea.

7K-n argitaratua.