Ornitorrinkoaren genomaren behin-behineko sekuentziazioa egin dute Missouriko Washington Unibertsitatean, eta narrastien nahiz ugaztunen geneak dituela aurkitu dute. Horri esker, animalien eboluzioaren zuhaitzean duen kokapena zehazteko bidea izango dute zientzialariek, bai eta ugaztunek nondik eta nola eboluzionatu zuten ezagutzeko bidea ere.
Ornitorrinkoa oso bitxia da. Itxuraz, ematen du hainbat animaliaren gorputz-zatiak elkartuta eratutako animalia dela: ahateen antzeko mokoa du, atzapar palmatuak (errazago igeri egiteko), isats zapal eta zabala (kastoreena bezalakoa) eta abar. Itxura ez ezik, portaera ere zenbait animaliaren pot-pourri bat da: ugaztuna da, hau da, emeek ekoizten duten esneaz elikatzen dira kumeak, baina ernaldiaren zati bat arrautza batean ematen dute umekiek. Arrautzatik ateratakoan ez daude guztiz garatuta, eta, martsupalioen antzera, edoskitzaroan bukatzen dute garapena.
Ezaugarri horien guztien atzean geneak daude, noski. Zientzialariak liluratuta daude ikusita eboluzioan oso urrun dauden animalien hainbat ezaugarri genetikok bat egiten dutela ornitorrinkoan. Adibidez, hainbat ugaztunek obuluen alde peludikoa sortzeko dituzten geneak ditu, baita hegazti, anfibio eta arrainetan bakarrik aurkitu dituzten bi ZPAX gene ere, eta bitelogenina genea ere bai (arrainen eta hegaztien arrautzen proteina-mota bat sortzen du gene horrek).
Argazkia: Healesville Sanctuary
Lakar Iraizoz, Oihane
Elhuyar Zientzia Elhuyar Fundazioko Zientziaren Komunikazioa sailean ari da lanean 2006ko urriaz geroztik. Elhuyar Zientzia eta Teknologia aldizkarian ia hilabetero artikuluak argitaratzen ditu, eta Basque Research webguneko arduraduna eta erredaktorea ere bada. Euskal Herrian egiten den ikerketaren berri ematen du Basque Researchek. Biologian lizentziatua da, Leioako EHUn egin zituen ikasketak, eta, Elhuyar Fundazioan baino lehen, Bertiz Jaurerria Parke Naturalean aritu zen lanean, bisitariei harrera egiten eta ingurunea zaintzen.
