Mikaren habian kukua
1996/02/01 Elhuyar Zientzia Iturria: Elhuyar aldizkaria
Espainiako kuku mottodunek espeziea babesteko, Mafiaren tankerako trikimailua darabilte. Hala adierazi dute behintzat animalien jokabideak aztertzen dituzten Kopenhage Unibertsitateko ekologistek. Andaluzian sumatu dutenez, mikaren habien %60 baino gehiagotan kuku mottodunek bere arrautzak ipintzen dituzte.
Mikak arrautza arrotzak habitik jaurtitzen ditu, baina baztertutakoen portzentaia, arrautza guztien %5a besterik ez da izaten. Hala ere, kukuaren mendekua izugarria da: mika arrautzak txikitu edota kumeak hil arte mokokatzen ditu.
Mikaren habitik kuku-arrautza ipini berria atera zuten batean, ikertzaileek ikusi ahal izan zuten nola kuku emeak habiko mika-arrautza guztiak txikitu zituen. Hala ere, mika-kumeak hiltzearen errudun bakarrak kuku emeak direnik ziurtatzerik ez dute lortu oraindik. Ekologista horien ustez, kuku-mota horren jokabidea tartean behin mika-habiak begiratu eta zaintzea da eta bere arrautzetakoren bat jaurtia izan dela ikusiz gero mendeku hartzen du. Dena den, ez dute uste ikertzaileek espeziea babesteko kukuek darabilten trikimailua %100ean eraginkorra denik.
Kuku mottodunak mikaren habia du gogoko bere kumeentzat.
Gai honi buruzko eduki gehiago
Elhuyarrek garatutako teknologia
