Metala ultragogor bihurtzeko bidea

Metalak trinkotzeko metodo bat garatu dute elkarlanean Estatu Batuetako eta Suitzako ikertzaile batzuek. Energia handiko laser batek eragindako presio-uhinak metalaren aurka igorrita lortu dute metala % 20 konprimitzea, gutxi gorabehera. Eskala mikroskopikoan, metalak ez dira jarraituak eta zurrunak, baizik eta kristal ñimiñoz osatutako mosaikoak. Presio-uhinek kristaltxoetan pitzadurak sortzen dituzte, eta materiala trinkotu egiten da. Ondorioa metal ultragogorra da. Oraingoz, teknika hori metal-kantitate oso txikietan aplikatu ahal izan dute.