Phoenix zunda lur hartzen

Maiatzaren 25ean iritsi zen Phoenix zunda Marteren gainazalera. Lurreratzea bertatik bertara ikusteko, Marteren inguruan biraka dabiltzan hiru sateliteen orbitak aldatu zituzten, Phoenix iritsiko zen unean inguru hartan egon zitezen. Mars Reconnaissance Orbiter espazio-ontziak egin zituen alboan ikusten diren argazkiak. Une hartan gainazaletik hamar bat kilometrora zegoen Phoenix, eta artean paraxuta irekita zuen (argazki txikian, zunda paraxutetik zintzilik ikusten da). Hainbat betebehar ditu orain Phoenix-ek, besteak beste, Marten bizia egon ote zen edo egon daitekeen zehaztea, Marteren klima deskribatzea eta planetaren geologia aztertzea.

Argazkia: NASA/JPL/Arizonako Unibertsitatea