Opportunity-ren berriak Martetik

strong>Martera bidalitako Opportunity ibilgailuak erakutsi omen du bere inguruan dauden arrokak ur likidoarekin kontaktuan egon zirela garai batean. NASAko zientzialarien ustez, horrek esan nahi du bizia egoteko kondizio egokiak izan zirela.

Ebidentzia nagusi bi erabili dituzte ondorio horretara iristeko: batetik, harrien itxura (arroken geruzapen gurutzatua, aurkitutako partikula esferikoak eta arraildurak), eta, bestetik, sulfato-gatzen kantitate handia. Gatz horiek uretan eratzen dira Lurrean, edo, eratu ondoren, uretan luzaroan egoteagatik eraldatzen dira.

Bizia egoteko kondizio egokiak aurkitzeak, ordea, ez du esan nahi bizirik egon denik, eta momentuz ez dago hori jakiterik. Opportunity eta Spirit ibilgailuak ez daude bizia bilatzeko prestatuta, eta, horretarako, etorkizunean laginak Lurreko laborategietara ekarri ahal izatea beharrezkoa dela nabarmendu dute.