Hies-aren kontrako bide berriak

Ogi-arbolaren fruituari ateratako zuku batek, jakalina izenekoak, HIV birusa (HIES-arena) in vitro inhibitu egin du Montpellier-ko Mikrobiologia eta Inmunologiako Institutuan egindako saiakuntza batean. Jean Favero zientzilaria izan da jakalinaren ahalmen honetaz konturatu dena.

Tropikoan hazten den ogi-arbolaren fruituari ateratako jakalina izeneko zukuak, zelulak HIV birusetik babestuko lituzke.

Kutsatutako linfozitoetan eraginik ez badu ere, sano dauden bitartean babestu egiten ditu. Molekula hau hain toxikoa izan ez dadin aldatu ondoren, ikerlariek in vivo saiakuntzak egiteko prestatzen ari dira.

Iparrame-riketan bestetik, Boston-go Ospitale Nagusian beste sendagai baten bila ari dira. Hiru produktu elkartuta erabili nahi dituzte: AZT, DDI (bi hauek batera askotan erabili dira) eta hirugarren substantzia, azken hau piridinonea edo nebirapinea izan daitekeelarik. Molekula guzti hauek birusak ugaltzeko behar duen entzima bati erasotzen diote; transkriptasa inbertsoari, hain zuzen.

In vitro egindako lehen saiakuntzek adierazten dutenez, hiru substantzia hauen nahasteak zelulak babestu eta kutsatutako zelulak senda ditzake. Orain “cocktail” hau gizakiari aplikatzea falta da, baina luze baino lehen ekingo diote horri.