Herritarren % 53,7k uste du trantsizio ekologikoak gatazka sozialak ekarriko dituela

Trantsizio Justuaren Behategiak egindako azken inkestaren arabera, Espainiako herritarren % 63k uste du klima-aldaketak lehentasunezko ekintza-jarduera izan behar duela, baina era berean, horren aurka ekiteko estrategiez galdetzean, herritarren % 53,7k uste du trantsizio ekologikoak gatazkak sortuko dituela gizartean. Gero eta jende gehiagok aurreikusten ditu gatazkak: 2023an % 23k ikusten zuen, 2024an % 39k, eta aurten ia 4 puntu portzentual gehiagok.

Herritarren ehuneko handi bat trantsizio ekologikoak ekar ditzakeen aldaketekin kezkatuta azaltzen da, baina, aldi berean, % 62k aurreikusten du zuzenean herritarron osasuna hobetuz inpaktatuko duela. % 67k dio airearen eta uraren kutsadura murriztuko duela batez ere. Baina % 21,6 beldur da bere lana desagerrarazi edo asko eraldatuko ote duen. Batez ere gizonek dute kezka, % 25k; ez horrenbeste emakumeek, % 17.

Bestetik, trantsizioan aurrera egiteko norbanakoek hartu beharreko neurriez galdetzean, % 51 bakarrik mugitzen da garraio publikoan, oinez edo bizikletaz egunerokotasunean. Halaber, % 28,2 bakarrik legoke prest zerga gehiago ordaintzeko, % 42,3k haragi gutxiago jateko, eta % 48,5 energia-iturri garbiago baten alde gehiago ordaintzeko. Gainera, neurri horiek hartzeko prestutasuna oso modu nabarmenean murrizten ari da urterik urte.

Laburtuz, herritarren % 46k trantsizio ekologikoarekiko konpromisoa erakusten du, % 39 eszeptiko azaltzen da eta % 15,5k jarrera immobilista du.

Kontuan hartzeko hainbat faktore nabarmendu ditu txostenak. Batetik, herritarren egoera sozioekonomikoa kontuan hartzea aldagai esanguratsua da trantsizio ekologikoari begira: zailtasun ekonomikoak dituztenen artean % 53k ematen dio lehentasuna klima-aldaketaren aurka borrokatzeari (bataz besteko % 63aren aldean) eta % 39k daki zer den ondo trantsizioa (bataz besteko % 47are aldean). Bestetik, generoa ere bada aldagai garrantzitsua, neurri apalagoan bada ere: emakumeen % 84 ziur da klima-aldaketaren existentziaz, baina gizonen % 76 baino ez.