Hartz beltzaren hibernazio harrigarria

Hartz beltzen (Ursus americanus) hibernazioa aztertu dute Alaskako Unibertsitateko zenbait ikertzailek. Azterketa horretatik ateratako ondorioak harrigarriak dira oso. Izan ere, hartz horien gorputzeko tenperatura gutxi jaisten dela ikusi dute; jarduera metabolikoak, berriz, nabarmen egiten du behera.

Oro har, organismo baten prozesu kimiko eta biologikoak gutxi gorabehera% 50ean murrizten dira, 10 graduko gorputzeko tenperaturaren jaitsierarekin. Hartz horietan, berriz, 5 eta 6 gradu jaisten da soilik. Jarduera metabolikoa, ordea, espero litekeen baino askoz gehiago jaisten dela ikusi dute; ohikoa baino % 75. Gainera, hibernazioaren ostean animalia horien metabolismoak zenbait astetan erritmo horretan jarraitzen duela ikusi dute ikertzaileek.

Hori guztia aztertzeko, infragorri-kamerak, mugimendu-detektagailuak eta bar erabili dituzte. Halaber, zenbait irrati-transmisore ezarri zizkieten negualdiko hartz horien gorputzeko tenperatura, bihotz-taupadak eta muskulu-jarduera —besteak beste— neurtzeko. Science aldizkarian eman dute ikerketa horren berri.

Irudia: Øivind Tøien, Alaskako Unibertsitatea.