Hainbat eboluzio-bide egitura berera iristeko
2005/04/01 Elhuyar Zientzia Iturria: Elhuyar aldizkaria
Australiako hegoaldeko kostan ornitorrinkoaren –monotrematuen– antzinako arbaso baten fosila aurkitu dute. Espezie berria da paleontologoentzako, eta Teinolophos trusleri izena jarri diote.
![](images/A208022.jpg)
Horraino ez dirudi aurkikuntza horrek halako garrantzirik daukanik, baina monotrematu horren erdi-belarrian dago ustekabea; izan ere, hezurtxo bakarra du –monotrematu modernoek, aldiz, hiru, gainerako ugaztunek bezala–.
Logikak hala aginduta, orain arte uste zen ugaztun-talde horien arbaso komunak bazuela hiru hezurtxoko egitura konplexu hori. Baina T. trusleri duela 115 milioi urte bizi izan zen; ordurako eboluzioan banatuta zeuden ugaztun plazentalioak, martsupialioak eta monotrematuak.
Beraz, ugaztun monotrematuek eta gainerakoek eboluzio-bide desberdinei jarraitu zieten, baina, azkenean, egitura berera iritsi ziren, hiru hezurtxoko egiturara, alegia.
![](https://elia.eus/static/elhuyar/img/elia_RGB.png)