FBI eta hatz-markak

300 milioi hatz-markaz osatutako artxiboari etekina atera nahi bazaio, derrigor informatikaz baliatu beharra dago. Leku askotatik eta urrutitik erabili ahal izango den datu-base informatikoa behar da. Datu-basea handia denean ordea, tratamendu informatikoak berak ere luzeegi jotzen du, eta irtenbidea informazio-masa konprimatzea da. Konprimatzen denean, dena den, funtsezko informazioa ez da aldatu behar.

Hau guztia dela eta, FBIko zientzilariek Yale-ko unibertsitateko Coifman irakasleari dei egin diote, irudiak konprimatzen aditua delako. Honek aplikatzen duen metodo matematikoari esker, hatz-markaren hasierako informazioa irudi-zati txiki batera murrizten da, funtsezko informaziorik galdu gabe.

FBIk dioenez, 25 milioi dolar aurreztu ditu hatz-marken bilketa- eta informatizazio-lana dela eta. Sistema berria 1995. urtean ezarriko da erabat eta pertsona susmagarria telefono bidez identifikatzeko minutua beharko da (orain 20 minutu behar izaten dira).