Giza Zientzien arloan Mari Carmen Gallastegi bergararra saritu zuten. Ekonomia-analisien oinarrietan katedraduna da Euskal Herriko Unibertsitatean; eta, besteak beste, ingurumen-ekonomian eta eredu bioekonomikoen arloan egiten du lan. Gainera, nabarmentzekoa da sari hori jasotzen duen lehenengo emakumea dela.
Zientzia eta Teknologia arloko Ikerkuntako Euskadi Saria, berriz, Jose Maria Asua k jaso zuen. Emultsio-polimerizazioetan aditua, Euskal Herriko Unibertsitatearen Kimika Fakultatean katedraduna da, eta, besteak beste, Polymat institutuaren zuzendaria ere bada. Hain zuzen ere, fakultateko lankideei eskaini zien saria, irakasle zein ikasleei, guztien lanaren ordaina zela esanez.
Saria lehendakariaren eskutik jaso zuten, eta, hark ez ezik, ekitaldian parte hartu zuten Hezkuntza, Unibertsitate eta Ikerketa sailburuak eta Euskal Herriko Unibertsitateko errektoreak ere.
Nagore Rementeria Argote
Elhuyar Zientzia
Elhuyar Zientzia eta Teknologia aldizkarian erredaktore lanak egiteaz gain, irratian ere aritu izan da: aurkezle gisa egin zituen hainbat urte Euskadi Irratiko Norteko Ferrokarrillean Guillermo Roarekin batera. Gaur egun Teknopolis telebista-saioko erredaktorea da, ETBrentzat Elhuyar Fundazioak ekoizten duen saioan.
