Dena prest lasterketarako!

Hondartzarako koltxoneta baten itxura badu ere, eguzki-energiaz dabilen auto bat da goikoa. Argazkia 2001ean AEBetako 66 errepide mitikoa zeharkatuz egin zen lasterketan ateratakoa da; hain zuzen, lasterketa horretara Virginiako Unibertsitateak aurkeztu zuen autoa da, eta abiapuntuan autoari azken azterketa egiten ari dira parte-hartzaileak.

Aurten ere egingo dute eguzki-energia bidez dabiltzan autoen lasterketa 66 errepidean. Uztailaren 13an hasi eta 23a bitartean, auto horiek 3.700 km egingo dituzte. Abiapuntua Chicagon dute eta helmuga, berriz, Kalifornian; beraz, lautada handiak zeharkatu, Mendi Harritsuak igo eta Amerikako Basamortu Handia pasatu beharko dute ibilgailu berezi horiek.

Lasterketaren asmoak ingeniaritza-ikasleak akuilatzea eta eguzki-energia sustatzea dira. Eguzki-energiaz dabiltzan autoak ikaragarri garestiak dira; bidaiari bakar batentzako tokia duen auto batek zortzi metro karratuko eguzki-panelen azalera behar du. Horregatik, asko falta zaie merkaturatzeko, baina teknologia horren aurrerapenaren erakusgarri dira.

Bestetik, lasterketara aurkezten diren autoak bi kategoriatan banatzen dira: batean pieza merkeekin egindako autoak bakarrik onartzen dira, eta bestean nahi adina diru gastatuz egindako autoak lehiatzen dira. Zein motatako autoa uste duzue iritsiko dela lehenengo helmugara?