Calappa flammea espezieko karramarroak itsas barraskiloak jaten ditu, irudiko espezieetakoak besteak beste. Baina ez guztiak: irudiaren ezkerrean dauden horiek baztertu egin behar izaten ditu. Izan ere, maskor horiek ezkerretik eskuinera egiten dute (lebogiroak dira), eta karramarroaren eskuineko besoak (jateko erabiltzen duenak) ezin du bere zeregina bete.
Itxura batera, karramarroak barraskilo lebogiro bati buelta eman besterik ez lioke egin beharko maskorraren irekidura eskuineko aldean jartzeko; baina, dirudienez, beti atzealdetik heltzen dio barraskiloari karramarroak jateko garaian.
Karramarroaren zorionerako, barraskilo gehienen maskorra destrogiroa da, hau da, eskuinetik ezkerrera egiten du.
Kontu honek galdera bat ekarri die biologoei: maskor lebogiroa duten itsas barraskiloek abantaila hori badute, zer dela eta ez dira ugariagoak?
Rementeria Argote, Nagore
Elhuyar Zientziaren Komunikazioa
Elhuyar Zientzia eta Teknologia aldizkarian erredaktore lanak egiteaz gain, irratian ere aritu izan da: aurkezle gisa egin zituen hainbat urte Euskadi Irratiko Norteko Ferrokarrillean Guillermo Roarekin batera. Gaur egun Teknopolis telebista-saioko erredaktorea da, ETBrentzat Elhuyar Fundazioak ekoizten duen saioan.
