Aurten, exoplanetak ikusgai

Aurten, lehen aldiz, astronomoek lortu dute zuzenean ikustea planetak gurea ez den izar baten inguruan biraka. Dozena erdi exoplaneta inguru deskribatu dituzte azkeneko hilabeteetan, eta, Science aldizkariaren arabera, urteko bigarren berri nabarmenena izan da lorpen hori.

Ez da batere erraza astronomoentzat beste izar batzuen inguruko planetei antzematea. Batetik, tamaina aldetik hautemateko zailak dira guregandik urrun dauden planetak, eta, bestetik, izarrak planetak baino askoz argitsuagoak direnez, estali egiten dute inguruan biraka dituzten planetek islatzen duten argi apala.

Hortaz, teknika bereziak garatu behar izan dituzte zientzialariek izarren distira nolabait estaltzeko. Adibidez, irudiko argazkia argi infragorriari bakarrik antzematen dion teleskopio batez hartu zuten. Izarraren inguruan (irudiko hainbat koloretako zirkulua) hiru planeta ikus daitezke; zirkuluaren inguruko puntu gorriak dira.

Irudia: C. Marois/NRCC