Bakterioa ala kameleoia?

Normalean bakterioak aukeratzen ditu molekula horiek, baina ez beti, Japoniako ikertzaileek argi ultramorearen pean dirdiratzen duten E. coli bakterioak sintetizatzea lortu baitute. Fluoreszina molekulak txertatu dizkiete E. coli bakterioak kanpoko pareta eraikitzeko erabiltzen dituen molekulei, eta kultiboan ipini dituzte hazten ari ziren bakterioekin batera.
Emaitza: estalki fluoreszenteko bakterio osasuntsuak.

Ikertzaileek esan dutenez, aplikazio ugari izan ditzake halako ikerketa batek. Hasteko, kolore desberdinetako estalkien bidez, bakterioak bereizteko metodoa gara dezaketela uste dute, baina adibide gehiago ere eman dituzte. Esaterako, bakterioek botika berriak probatzeko balio dezakete gizakien zelulen antza duten estalkiak ipiniz gero, edo patogenoz mozorrotuta txertoetan erabil daitezke.

Ikerketa Journal of the American Chemical Society aldizkarian argitaratu da eta Nature aldizkariak jaso du bere web gunean.