Intsektuen dibertsitatea aztergai

Ozpin-eulia.

Betidanik, naturaren ezaugarria izan da biologoentzat intsektu-espezieen kopuru handia. Eboluzioak milioika urte izan ditu animalia horiek guztiak diseinatzeko, baina hain dibertsitate handia lortzea ez da denbora-kontua bakarrik.

American Association of Advancement of Science erakundeko urteko bilera nagusian aurkeztu da gai horri buruzko gogoeta bat. Ron Galant eta Sean Carroll biokimikari estatubatuarrek gene homeotikoen ( Hox geneak) ekarpena aztertu dute. Hox geneek izaki baten organoek eta gorputz-zatiek non hazi behar duten kontrolatzen dute. Adibidez, begiak buruan (eta ez abdomenean) kokatu behar direla zehazten dute.

Zientzialariek Ultrabithorax ( Ubx ) izeneko Hox geneak erabili dituzte esperimentuetan. Ubx geneek intsektuaren gorputz-adarrak non lotzen diren kontrolatzen dute, eta, lan horren emaitzen arabera, ez dira guztiz ezberdinak espezie batetik bestera. Biokimikariek ozpin-euliaren eta beste lau intsekturen Ubx geneen zati bat berdina dela aurkitu dute. Aldiz, onikoforoarena oso ezberdina da. Onikoforoak artropodoen eta harren ezaugarriak ditu, eta ez du gorputza zatitan banatuta.

Onikoforoa.

Ozpin-euliaren Ubx geneak onikoforoari txertatu zizkiotenean, azken horrek gorputz-zatiak garatu zituen, hau da, intsektuen ezaugarriak garatu zituen. Horrek esan nahi du ADN-zati txikiek eboluzioaren aldaketa handiak kontrola ditzaketela. Gainera, morfologia aldatzeak kasu askotan funtzio biologikoak aldatzea ekar dezake.