Ingurune berdeek osasunean nola eragiten duten aztertu dute

INMA proiektuan, ingurune naturalek haurren osasunean duten onura ikertu dute. Izan ere, ikerketa ugari egin dira osasunean eragin kaltegarria duten ingurumen-aldagaiak aztertzeko, baina ez alderantziz. Hutsune hori betetzeko asmoz, ingurune berdeen eraginari buruzko azterketa epidemiologikoa egin du ikertzaile-talde batek: Biodonostiako ikertzaileak, EHUko Mekuntza eta Erizaintza eta Psikologiako fakultateetakoak, Eusko Jaurlaritzaren Gipuzkoako osasun publikoaren eta adikzioen zuzendariordetzakoak eta Carlos III Osasun Institutukoak.

Ikerketan, Geografia Informazio Sistemak (GIS) erabili dituzte, eta datu objektiboak eta subjektiboak bildu dituzte: partaidearen etxebizitza inguruko berdetasun-maila, 300 metroko inguruan gune berderik duen ala ez, eta gertuena zein distantziatara dagoen, batetik, eta inkestetan azaldutako pertzepzio subjektiboa, bestetik.

Horrez gain, gune berdeek osasunean zein bitartekariren bidez eragiten duten sailkatu dute: ingurumenarekiko esposizioa (karbono dioxidoa xurgatzea, trafikorik eza, tenperatura eta hezetasuna erregulatzea); jarduera fisikoa; gizarte-kohesioa; eta estresa arintzea eta atentzioa berreskuratzea. Osasuna neurtzeko, berriz, sei arlori erreparatu diete: ugalketa-osasuna, jarduera fisikoa, osasun mentala, asma eta alergia, ondorio kardiobaskularrak eta hilkortasuna. 

Azkenean, 17 ikerketaren emaitzak hartu dituzte aintzat, eta ikusi dute ingurune berdeek bitartekarien bidez eragiten dutela osasunean, bai eragin kaltegarriren bat aritzen dutelako, baina onuragarriren bat areagotzen dutelako. 

Ondorioztatu dutenez, bitartekari garrantzitsuenetako bat berrezarpenaren gaitasuna da: gizakiak naturarekin eboluzioan eduki duen harremanarengatik, gizakion mekanismo asko hobetzen dira, eta, onurak fisikoak zein mentalak dira. Hala ere, bitartekari aipatuenak jarduera fisikoa eta aire-kutsadura dira, eta bigarren maila batean azaltzen dira zarata, giza kohesioa eta depresioa.