Elhuyar zientziaren komunikazioa

Perovskita desordenatuak eguzki-panelen eraginkortasuna handitzen du

2019/11/12 Agirre Ruiz de Arkaute, Aitziber - Elhuyar Zientzia Iturria: Elhuyar aldizkaria

perovskita-modu-desordenatuan-sortuta-eguzki-panel
Karga-eramaleak (morez) desordenatutako perovskita-egituretan nola pilatzen direla erakusten duen ilustrazioa. Arg. Ella Maru Studio

Belaunaldi berriko eguzki-panelei bultzada eman diezaiekeen ikerketa argitaratu du Nature Photonics aldizkariak. Silizioa perovskita materialez ordezkatzeko helburuz, perovskita-geruza homogeneoagoak egiteko moduak bilatzen ari ziren, baina Cambridgeko Unibertsitateko ikertzaileak ustekabean konturatu dira nolabaiteko desordena kimikoak haien eraginkortasuna handitzen duela. Izan ere, desordena horretan, perovskita-xaflan konposizio desberdineko guneak sortzen direla ikusi dute, nolabaiteko haranak eta mendiak, karga-eramaleak hobeto harrapa ditzaketenak. Nahaste-maila egokia identifikatu beharko dute orain.

Azken hamarkadan, perovskita materialak indar handiz sartu dira, horiek sortzeko behar diren berun-gatzak askoz ere ugariagoak eta merkeagoak direlakoan eguzki-zelula arruntak egiteko erabiltzen den silizio kristalinoa baino. Tinta likido soil batean prestatu daitezke, inprimatu eta materialaren geruza bat sortzeko. Orain, egitura guztiz ordenatuen beharrik ez dagoela argitu izanak, are gehiago sinplifikatuko du haien fabrikazioa. 

Perovskitak badu arazorik ebazteko hezetasunarekiko sentikorra da eta denborarekin aldatuz doa bere egitura–, baina aukera berriak ere ekar ditzakeela adierazi dute lanaren egileek. Perovskita-geruza fin-fina nahikoa denez silizioaren pareko eraginkortasuna lortzeko, leihoetan jartzeko aukera aztertzen ari dira. Gainera, kolore desberdineko bi perovskita-geruza gainezartzeko aukera ikertzen ari dira, hobeto aprobetxa dezaten eguzki-argiaren espektroa.

Gehitu iruzkin bat

Saioa hasi iruzkinak uzteko.

Saioa hasi

Erabiltzaile-izenik ez baduzu, eman izena

Pasahitza ahaztu zait

Jarraitu Zientzia.eus

Eduki gehiago

Gehitu zure bloga

Zientzia app

Webgune honek cookieak erabiltzen ditu zure nabigazio-esperientzia hobetzeko. Nabigatzen jarraitzen baduzu, ulertuko dugu cookie horien erabilera onartzen duzula. Onartu
Informazio gehiago
Babesleak

Kultura eta Hizkuntza Politika Sailak (Hizkuntza Politikarako Sailburuordetzak) diruz lagundua

Eusko Jaurlaritzako Industria, Merkataritza eta Turismo Saila
Gipuzkoako Foru Aldundia