Erreinu berria itsas hondoko tximinietan

Hain zuzen ere, orain mikroorganismo zelulabakar horiek ikertzaile batzuen arreta piztu dute. Protista erreinukoak zirela uste zuten arren, azken azterketen arabera, baliteke erreinu berri bat sortzea mikroorganismo horietako batzuk sailkatzeko.

Urrutira gidatutako ibilgailu baten bidez, Atlantikoaren erdialdeko dortsalean, tximinia baten inguruko jalkinen nukleoa bildu dute ikertzaileek. Gero, laginaren DNA erauzi dute, eta 18S RNA erribosomikoa kodetzen duen gunea aztertu dute. Izan ere, DNAren gune hori bizidunek izandako eboluzioa ondorioztatzeko erabiltzen da, aldaketa gutxi izaten baititu eta maiztasun jakinarekin gainera.

DNA aztertuta ateratako datuekin zuhaitz filogenetikoa egin dute, eta orduan ikusi dute jalkinean dauden mikroorganismoetatik gutxienez bi protistetatik oso desberdinak direla genetikoki. Hain dira desberdinak, ezen erreinu propioa izatea merezi baitute. Hala uste dute behintzat ikertzaile horiek, eta Proceedings of the National Academy of Sciences web gunean haiek biltzeko erreinu berria sortzea proposatu dute. Beraz, baliteke orain arteko erreinu nagusiei beste bat gehitzea. Monera, Protista, Fungi, Animalia eta Plantae erreinuak dira orain artekoak.