Elhuyar zientziaren komunikazioa

Sagu jaioberriei epe luzeko kalteak eragiten dizkiete antibiotikoek osasunean

Aldaketak ikusi dituzte hesteetako mikrobiotan, garuneko fisiologian eta portaera sozialean.

2017/04/04 Agirre Ruiz de Arkaute, Aitziber - Elhuyar Zientzia Iturria: Elhuyar aldizkaria

haur-txikiei-antibiotikoak-emateak-epe-luzeko-kalt
Arg. Pixabay

Jaioberritan antibiotikoak hartzeak epe luzera ondorio kaltegarriak dituela ondorioztatu du ikerketa batek. Dagoeneko baziren kalte horien ebidentziak, batez ere dosi handitan erabilita, baina oraingoan, saguekin egindako ikerketa batek agerian utzi du dosi txikitan erabilita ere epe luzeko kalteak eragiten dituela osasunean.

Zehazki ikertu dute zer eragin duen penizilina hartzeak ernaldiaren azken fasean eta titia utzi arteko aldian, eta bietan parekoak direla ikusi dute: hesteetako mikrobiota eraldatzen du, erantzun immunea erregulatzen duten zitokinen kontzentrazioa handitzen du garunean, hesi hematoentzefalikoaren iragazkortasuna aldatzen du, eta, azkenik, portaera soziala murriztu eta jarrera jazarkorra areagotzen du. Bi sexuetan ikertu dute, eta berdin uzten ditu kalteak epe luzean. Nature Communications aldizkarian argitaratu dute ikerketa.

Bestetik, ikusi dute antibiotikoarekin batera probiotiko bat hartu dutenean (Lactobacillus rhamnosus bakterioa), alterazio horietako batzuk partzialki murrizten direla. Baina ikerketa gehiago behar direla aipatu dute, antibiotikoak jaioberriekin erabiltzeak geroko desoreka neuropsikiatrikoetan duten eragina murrizteko balio ote lezakeen frogatzeko.

Ikerketaren egileek nabarmendu dute jada argi dagoela mikrobiotaren konposaketak garunaren funtzioak eraldatzen dituela, jarrera soziala barne. Dagoeneko ikerketa askok erakutsi dute hesteetako bakterioen erabateko gabeziak eragiten duela hesi hematoentzefalikoarearen iragazkortasuna aldatzea, mikrogliaren erantzun immuneak okerrera egitea, mielinizazioa areagotzea, hipotalamoan hiperaktibitatea azaltzea, garunaren neurokimika aldatzea, eta antsietatea eta portaera sozialak murriztea.

Hesteetako bakterioen inguruko informazio osagarria:

0.0/5 rating (0 votes)

Gehitu iruzkin bat

Saioa hasi iruzkinak uzteko.

Saioa hasi

Erabiltzaile-izenik ez baduzu, eman izena

Pasahitza ahaztu zait

Jarraitu Zientzia.eus

Eduki gehiago

Gehitu zure bloga

Zientzia app

Babesleak

Kultura eta Hizkuntza Politika Sailak (Hizkuntza Politikarako Sailburuordetzak) diruz lagundua

Eusko Jaurlaritzako Industria, Merkataritza eta Turismo Saila
Gipuzkoako Foru Aldundia