Elhuyar zientziaren komunikazioa

Eman diote azken agurra Cassini zundari

2017/09/15 Galarraga Aiestaran, Ana - Elhuyar Zientzia Iturria: Elhuyar aldizkaria

eeman-diote-azken-agurra-cassini-zundari
Cassini zundak bidalitako azken irudiak. Arg. NASA/JPL-Caltech/Space Science Institute

Lurretik abiatu zela 20 urte igaro direnean, 13 urtez Saturno eta haren ilargiak eta eraztunak behatu ondoren, eta erregaia agortzeko zorian zuela, bere burua planetaren aurka botata suntsitu da Cassini zunda.

Gehienetan, erregaia agortutakoan bidaiatzen jarrai dezaten uzten diete zundei; oraingo honetan, ordea, horrela amaitzea erabaki dute, ez dutelako zoriz Entzeladorekin edo Titanekin talka egiterik nahi. Izan ere, Saturnoren bi ilargi horietan bizia hartzeko kondizioak daudela baieztatu dute ikertzaileek; beraz, talka eginez gero, zundak Lurretik eramandako bizidunekin haiek kutsatzeko arriskua legoke.

Amaiera iragarrita zegoen modukoa izan da. Amaiera Handia deitu zioten, eta, berez, apirilean hasi zen. Titanen ondotik igaro zen, eta horrek norabidea aldatzeko behar zuen indarra eman zion. Hala, ordutik gaur arte 22 orbita egin ditu planetaren eta eraztunen artetik. Bitartean irudiak eta datuak bidaltzen aritu da. Azken irudiak atzo bidali zituen, eta gaur ordu biak baino pixka bat lehanago itzali da antena, zunda Saturnoren hodeietatik 1.500 km-ra zegoenean. Orduan amaitu da misioa. Alabaina, Cassinik jarraituko du Saturno eta haren ilargiak hobeto ezagutzeko zertzeladak ematen, ikertzaileek oraindik urteak beharko baitituzte bildu dituen datu guztiak aztertzeko eta ondorioak ateratzeko.

 

--> Cassini-Huygens misioaren gaineko erreportajea: Cassini 1997-2017

--> Misioari buruzko azalpenak ETB1eko Ahoz Aho saioan (37. minututik 56.era)

 

Gehitu iruzkin bat

Saioa hasi iruzkinak uzteko.

Saioa hasi

Erabiltzaile-izenik ez baduzu, eman izena

Pasahitza ahaztu zait

Jarraitu Zientzia.eus

Eduki gehiago

Gehitu zure bloga

Zientzia app

Webgune honek cookieak erabiltzen ditu zure nabigazio-esperientzia hobetzeko. Nabigatzen jarraitzen baduzu, ulertuko dugu cookie horien erabilera onartzen duzula. Onartu
Informazio gehiago
Babesleak

Kultura eta Hizkuntza Politika Sailak (Hizkuntza Politikarako Sailburuordetzak) diruz lagundua

Eusko Jaurlaritzako Industria, Merkataritza eta Turismo Saila
Gipuzkoako Foru Aldundia