Elhuyar zientziaren komunikazioa

Zer egiten dute astrozitoek?

2002/11/27 Roa Zubia, Guillermo - Elhuyar Zientzia

Izar-itxurako zelula horiek garuneko odol-jarioa kontrolatzen dute.

Garuna ez da neurona-multzo ordenatu soila. Jarduera elektrikoa duten zelula horiez gain, odol-hodiek eta glia izeneko euskarriak osatzen dute. Dena dela, glia ez da euskarria bakarrik; beste funtzio asko ere baditu. Adibidez, metabolismoaren ardura du gliak, eta hori oso garrantzitsua da, esate baterako, garunaren jarduera glukosaren kontsumoaren mendekoa delako.

Mota bat baino gehiagoko zelulek osatzen dute glia. Horien artean, astrozitoak daude, neuronen sinapsiei lotuta dauden izar-itxurako zelulak. Zelula horiek zer egiten duten ez zekiten zientzialariek; euskarri hutsak direla uste zuten. Orain, Padovako Unibertsitateko neurologo batzuek oso funtzio garrantzitsua dutela aurkitu dute: astrozitoek odol-jarioa kontrolatzen dute.

Neuronen jarduera elektrikoa handia den zatietan, astrozitoek odol-hodien muskuluak erlaxatzen dituzte, eta, horrela, beharrezko odol-kantitatea behar den tokira bideratzen dute une bakoitzean. Hori frogatzeko, zientzialariek arratoien garun-zatiak kitzikatu dituzte elektrodoen bitartez, eta, ondorioz, zona horretako odol-jarioa handitu egiten dela ikusi dute.

Beraz, astrozitoek zer egiten duten aurkitu dute; baina, neurologoek ez dakite nola egiten duten hori. Seguru asko, zelulek odol-hodien muskuluak uzkurtzen edo erlaxatzen dituzten substantziak isurtzen dituzte. Dena dela, hori oraindik hipotesia besterik ez da, eta ikusi egin beharko da ikerketak baieztatzen duen edo ez.

Gehitu iruzkin bat

Saioa hasi iruzkinak uzteko.

Saioa hasi

Erabiltzaile-izenik ez baduzu, eman izena

Pasahitza ahaztu zait

Jarraitu Zientzia.eus

Eduki gehiago

Gehitu zure bloga

Zientzia app

Webgune honek cookieak erabiltzen ditu zure nabigazio-esperientzia hobetzeko. Nabigatzen jarraitzen baduzu, ulertuko dugu cookie horien erabilera onartzen duzula. Onartu
Informazio gehiago
Babesleak

Kultura eta Hizkuntza Politika Sailak (Hizkuntza Politikarako Sailburuordetzak) diruz lagundua

Eusko Jaurlaritzako Industria, Merkataritza eta Turismo Saila
Gipuzkoako Foru Aldundia