Elhuyar zientziaren komunikazioa

Genoma editatzeko metodo berriak aurkeztu dituzte

2017/10/25 Galarraga Aiestaran, Ana - Elhuyar Zientzia Iturria: Elhuyar aldizkaria

genoma-editatzeko-metodo-berriak-aurkeztu-dituzte
Arg. MIT

Genoma eraldatzeko teknika berri bana aurkeztu dute Nature eta Science aldizkariek. Bietan Broad Institutuko (Harvard Unibertsitatea) eta MITeko ikertzaileek parte hartu dute, eta biek dute helburutzat gaitzak eragiten dituzten mutazio molekular txikiak zuzentzea. Bi tekniken arteko alde nagusia ituan dago: batean DNA sekuentziaren base nitrogenatuak dira, eta, bestean, RNAren nukleosidoak.

Berez, CRISPR-Cas9 metodo ospetsuaren moldaketak dira bi teknikak. Base nitrogenatuak aldatzean oinarritzen denari ABE deitu diote (Adenine Base Editor). Zehazki, adenina base nitrogenatuaren molekula aldatzen du, eta guanina itxura ematen dio. DNAk base-parea osatzen du, eta, hala, A-T parea (adenina-timina) G-C bihurtzen da (guanina-zitosina).

Aipatzekoa da base nitrogenatuen mutazioak gaitz askoren oinarri direla, eta, beraz, aplikazio zabala izan dezake terapian. Gainera, ikertzaileen esanean, metodoa oso eraginkorra izateaz gain, ez du albo-produkturik sortzen.

Beste teknikak, berriz, REPAIR izena du (RNA Editing for Programmable A to I Replacement), eta RNAren adenosina (A) inosina (I) bihurtzean datza. Adierazi dutenez, maila horretako mutazioak ohikoak dira eta gaitz ezagunekin lotuta daude, bestea beste, epilepsia-mota batzuk, Duchenne muskulu-distrofia eta parkinsona. REPAIR teknikak aukera ematen du mutazio horiek konpontzeko, beste ezer aldatu gabe, ezta DNA ere, eta edozein zelulatan erabil daiteke.

Bai ABE bai REPAIR laborategian probatu dituzte, giza zeluletan. ABE erabilita, hematokromatosi heredagarriaren mutazioa konpondu dute, eta REPAIRen bidez, berriz, Fanconi anemiarena.

 

Gehitu iruzkin bat

Saioa hasi iruzkinak uzteko.

Saioa hasi

Erabiltzaile-izenik ez baduzu, eman izena

Pasahitza ahaztu zait

Jarraitu Zientzia.eus

Eduki gehiago

Gehitu zure bloga

Zientzia app

Webgune honek cookieak erabiltzen ditu zure nabigazio-esperientzia hobetzeko. Nabigatzen jarraitzen baduzu, ulertuko dugu cookie horien erabilera onartzen duzula. Onartu
Informazio gehiago
Babesleak

Kultura eta Hizkuntza Politika Sailak (Hizkuntza Politikarako Sailburuordetzak) diruz lagundua

Eusko Jaurlaritzako Industria, Merkataritza eta Turismo Saila
Gipuzkoako Foru Aldundia