}

Edzard Ernst: "Tratamendu alternatiboek ez dute benetako eraginik pazienteengan"

2011/07/05 Lakar Iraizoz, Oihane - Elhuyar Zientzia

Elhuyar Fundazioak Edzard Ernstek eta Simon Singhek idatzi duten Sendabide ala iruzurbide. Medikuntza alternatiboa proban (Trick or treatment, alternative medicine on trial) liburua argitaratu du euskaraz, eta Edzard Ernst berak aurkeztu zuen Donostian. Gaur, arratsaldeko 7etan, izenburu bereko hitzaldia emango du Miramar jauregian (Donostian), eta sarrera irekia da. Hitzaldia ingelesez izango da, eta euskararako aldibereko itzulpena eskainiko da. Sendabide ala iruzurbide. Medikuntza alternatiboa proban

Hitzaldiaren aurkezpen gisa, elkarrizketa labur bat eskaini zuen atzo:

Liburuaren muina da Medikuntza alternatiboaren tratamendu ezagunenak aztertzea —besteak beste, akupuntura, homeopatia, aromaterapia, erreflexologia, kiropraktika eta sendabelarren medikuntza—, eta haiek proba zientifikoen bidez balioztatu ondoren, frogatutako onurak eta balizko arriskuak azaltzea. Egileen ustetan, “azterketa horietatik ondorio bat atera dugu: tratamendu alternatiboek ez dutela benetako eraginik pazienteengan, eta, eragina lortzen den kasuetan, plazebo efektua baino ez dutela”.

Edzard Ernst liburua eskuetan duela (Argazkia: Iñigo Ibañez).

Egileei buruz

Edzard Ernst Medikuntzan doktorea da, eta medikuntza alternatiboa irakasten duen munduko lehenengo pertsona da: egun, Medikuntza Alternatiboko irakaslea da Exeterko Unibertsitatean (Ingalaterran). Mediku klinikoa izana da, eta, homeopatia ikasi ondoren, homeopatia eta beste tratamendu alternatibo asko ematen jardun zuen. Mundu osoan lortu du ospea, terapia alternatiboen balioa modu zientifikoan aztertzeagatik. Simon Singh Partikulen Fisikan doktorea da, baina nagusiki zientzia-kazetaria da. BBCko zientzia-programen ekoizle gisa hasi zen lanean hainbat programa eginez, eta mundu osoan best-seller izan diren liburuak idatzi ditu, besteak beste Fermat’s Last Theorem , The Code Book , eta Big Bang .

Gai honi buruzko eduki gehiago

Elhuyarrek garatutako teknologia